И. Г. Папасқьыр ихьӡ зху Амилаҭтә библиотека аиҳабы.

Барис Шьаликәа-иԥа Ҷолариа диит 1948 шықәса сентиабр 20 рзы Очамчыра араион Тамшь ақыҭан. Д. И. Гәлиа ихьӡ зху Тамшьтәи абжьаратә школ далгеит 1966 ш. 1966 шықәсазы дҭалоит Аҟәатәи аиндустриалтә техникум дагьалгоит 1977ш. Арратә маҵзура ихигеит Хабаровск. Аԥсныҟа дгьежьуеит 1969 шықәсазы. 1970 ш. инаркны аус иуан Аҟәатәи агазеҭтә типографиаҿы, иара убри ашықәсан дҭалоит Аҟәатәи аҳәынҭқарратә педадогикатә институт агеографиатә факультет, далгоит 1975 ш. 1977 шықәса рзы аусура далагоит агеографиа рҵаҩыс №10 Аҟәатәи абжьаратә школ аҿы. Иаарласны диаган аҵара аминистрра аметодикатә ҟәшахьы. 1979ш. диаргеит Ареспубликатә хәыҷтәы екскурсиатә станциа аусмҩаԥгатәқәа реиҿкааҩ аҟәша еиҳабыс. Уи еиҿикаауеит ԥыҭк асоиузтә зегьеидгылатәи атуристтә еизарақәа.

Убырҭ зегьы инапы шалакызгьы Борис Ҷолариа атипографиаҿ иусура иациҵон. Далгеит Одессатәи аполиграфиатә техникум. 1989 шықәсазы аицлабратә шьаҭала далхын еиҳабыс агазеҭтә типографиаҿы Аԥсны еизаку аполиграфиа усеиҿкаараҿы.

1995 шықәса раахыс директорс дыҟоуп И. Гь. Папасқьыр ихьӡ зху Амилаҭтә библиотекаҿы. Иара ибзоурала аццышә иалхны ишьақәиргылоуп абиблиотекатә фонд, ашәҟәытә палата, ишьҭыхын аҳәынҭқарраҿ абиблиотека аус, еиқәиршәеит абиблиотекатә ус ихымԥадатәиу аекземлиар иазку азакәан, ишьақәыргылан Аԥсны аҳәынҭқарратә библиографиа. Имҩаԥсуеит иара ибзоурала зымҽхак ҭбаау апроектқәа. Ишьақәиргылеит агәыҳалалратә усеицурақәа жәларбжьаратәии иҳәынҭқарратәыми аиҿкаарақәа рыбжьара. Урҭ рыцхыраарала ишьақәыргылан аҟәшақәа: апериодика, аԥхьарҭатә зал, амилаҭтә литература аҟәша, иара убас ахыбра зегьы иҭасан асаркьақәа. Б. Ҷолариа ибзоурала иахьа еиқәырхоуп иуникалтәу абаблиотекатә фонд.

1998 ш. абибилиотека иаиуит астатус Амилаҭтә библиотека ҳәа. Борис Ҷолариа абиблиотекахь имоу агәыбылреи ахамеигӡареи ихатә ԥышәеи ирыбзоураны иҽазҵәылхны ихықәкы наигӡоит, есымшааира Амилаҭтә библиотека иадиԥхьалоит иахәаша ауаа, ацхыраара азҭаша аспонсорцәа...

2002 шықәсазы уи имч ала еиҿкаахеит аелектронтә каталог атехнологиа ҿыцқәа рыҟәша, абиблиотекатә процессқәа автоматизациа рзура, аелектронтә каталог «ИРБИС» аилазаарала аиқәыршәара. Урыстәыла Афедерациа еиуеиԥшым арегионқәа рбиблиотекақәа рыбжьара аимадарақәа еизырҳауа жәларбжьаратәи абиблиотекатә конференциақәа ихы рылаирхәуеит. Аиԥыларақәеи аиҿцәажәарақәеи ирыбзоураны илшеит урыстәылатәи абиблиотека хадақәа рыбжьара акыр еиқәшаҳаҭрақәа рыбжьаҵареи, аусеицзуреи.

Борис Ҷолариа иидеиа ала Аԥснытәи аҳәынҭқарратә университет аҿы иаартын «Архҭҵаареи абиблиотекатә-информациатә усуреи» рыҟәша. 2010 шықәса рзы, ари азанааҭ ала иоужьын актәи аушьҭымҭацәа.

2017 шықәсазы , Б. Шь. Ҷолариа ианашьан «Аԥсны акультура аусзуҩы» ҳәа аҳаҭыртә хьӡы. 1987 шықәсазы ихҵан «Қырҭтәыла ССР зҽаԥсазтәыз арҵаҩы» ҳәеи «Ҳаҭыр зқәу аполиграфист» ҳәеи ахьыӡқәа.