Ҳазну ашықәс абҵара 27 рзы ихыркәшахеит аинтернет-форум «Ашьапылампыл - аспорт, аҟазара, арҿиара» ҳәа захьӡыз Жәларбжьаратәи апроект. Апроект авторцәас, еиҿкаҩцәас иаман И. В. Варрава ихьӡ зху Краснодартәи атәылаҿацә аҿартә библиотека аусзуҩцәа. И. Гь. Папасқьыр ихьӡ зху Амилаҭтә библиотека есышықәса рҽаладырхәуеит аинтернет-форум. Уи иадрыԥхьалоит абибоилтека аԥхьаҩцәеи, иара убас аусзуҩцәеи. Урҭ хымԥада иааныркылоит аԥхьахәқәа.

Аинтернет-форум ахықәкы хадақәа...

Афорум хықәкыс иамоуп амилаҭқәа зегьы рыҩнуҵҟа аҿар резааигәатәра, ркультуреи рлитературеи реимадара. Аԥснынтәи есышықәса еиуеиԥшым атемақәа рыла иддырдыруеит ҳкультуреи ҳлитературеи. Сынтәа иазкын Аԥсны ашьапылампыл аҭоурых аарԥшра. Афорум иамоуп аноминациақәа, уи иуеилнаркаауеит доусу итәыла иамоу атрадициақәа. Аинтернет-форум сынтәа ҩышықәсоуп иагоижьҭеи аԥхьахә «Иҿоу автор» аномаинациала.

Афорум алахәылацәа еицлабуеит, иара убас аноминациа «Иреиӷьу авидеонҵамҭа кьаҿ» аҟны. Уи иарбан тәылазаалак алахәыла иҟаиҵоит авидеонҵамҭа кьаҿ егьи атәыла иазкны. Ари анаминациа аҟынгьы Аԥсны иаиухьеит аԥхьахәқәа: «ахьи» «аџьази».

Аинтернет-форум 2018 ашықәса азы Аԥснынтәи иалахәыз.

2016 шықәса раахеижьҭеи Краснодартәи атәылаҿацә аҿартә библиотека И. Ф. Варавва ихьӡ зху еиҿнакаауа Жәларбжьаратәи апроект «Аевразиатә библиотекатә интернет-форум» сынтәа иахьӡын «Ашьапылампыл -аспорт, аҟазара, арҿиара еиднакилоит» ҳәа. Иалахәын: Аԥсны, Беларуссиа, Казахсҭан атәылақәа, иара убас Урыстәыла. Афорум аихшьаала аҟаҵара иазкны аиԥылара мҩаԥган аҳәынҭқаррақәа рҟынтәи иалахәыз ахьубаша аекран ду аҿы авидеоконференциа аформа ала. Аԥсны уи аҩыза алшара рыман имҩаԥыргарц «Sputnik Аԥсны» азал аҟны, аинтернет еимадаратә цҳала. Уи иалахәын Амилаҭтә библиотека аиҳабы Борис Ҷолариа раԥхьа днаргыланы иусзуҩцәеи, иара убас Аҿар руси аспорти рзы Аҳәынҭқарра ахеилак ахантәаҩы ихаҭыԥуаҩ, асоветтә шьапылампыл асҩы, Аҟәатәи «Динамо» ахәмарҩы Рафаель Амԥари, аспортсмен ҿа, абиблиотека аԥхьаҩ Ерик Кеилиани. Уи сынтәатәи антернет-форум аҿы «Иҿоу автор» иноминациала актәи аҭыԥ ааникылеит.

Аконференциаҿы Рафаель Амԥар иҳәеит, Аԥсны ашьапылампыл иааннакыло аҭыԥ, дрыхцәажәеит аҭоурых аҿы хьтәы нбанла зыхьӡ аанхаз аспортсменцәа ҟазацәа. Уи гәахәарала дазыгәдуны дазааҭгылеит Аԥсны имҩаԥысуаз ашьапылампыл ачемпионат ConIFA.

Аиԥылара ахыркәшамҭаз аинтернет-форум алахәылацәа иҭабуп ҳәа рарҳәеит аиҿкааҩцәа, урҭ ирҳәеит ҽаангьы гәахәарыла рхы шаладырхәуа атәы.

И. Гь. Папасқьыр ихьӡ зху Амилаҭтә библиотека аилазаара, Аинформациатә-огенства «Sputnik Аԥсны» аиҳабыра иҭабуп ҳәа рарҳәоит сааҭк аҭагылазаашьа ахьрырҭаз, видеодырраҭара зхаҭабзиара ҳаракыз аинтернеттә-цҳа ахархәара.