И. Гь. Папасқьыр ихьӡ зху Амилаҭтә библиотекаҟны Аԥсны ашәҟәыҩҩцәа Реидгыла аԥшьгарала имҩаԥган астол гьежь «Аԥсуа бызшәеи ҳаамҭазтәи аинформациатә техналогиақәеи» ртемала. Уи иалахәын: ашәҟәыҩҩцәа, аҳәынҭқарратә бызшәатә политиказы Аҳәынҭқарратә еилакы анапхгара, Аԥснытәи аҳәынҭқарратә университет азанааҭдырыҩцәа, аԥсышәала иҭыҵуа агазеҭқәеи ажурналқәеи рредақциақәа рнапхгаҩцәа, урҭ русуҩцәа, Амилаҭтә библиотека аусзуҩцәа уҳәа егьырҭгьы.

Хықәкыла иизааҭгылаз...

Астол гьежь аҟны ҷыдала иазааҭгылан аԥсуа шрифтқәеи акомпиутертә программеи. Аԥсуа шрифтқәа зусураҿы зхы иазырхәо аусҳәарҭақәа акомпиутертә программа ахархәараан иҟоу аԥынгылақәа, насгьы хара имгакәа ишырҽеитәу атәы. Аҭыжьра знапы алаку реиҳараҩык аус зларуа «пеџьмекер апрограмма» ауп. Уи ажәхьеит, ииастәуп апрограмма ҿыц «Индизаин» ашҟа. Ари апрограмма ААУ аҟны азанааҭдырыҩцәа иԥыршәахьеит, аус рыдырулахьеит аԥсуа шрифтқәа. Ажурналқәеи агазеҭқәеи рредақциақәа русзуҩцәа иахьа рхы иадырхәо ArtalFBH ҳәа ишьақәгылахьаз ауп. Уи ахаҭыԥан аус адулоуп ArealAB ҳәа иҟоу ашрифт ҿыц. ArealABH ашрифт ажәхьеит, жәларбжьаратәи астондарт иақәшәаӡом, игьаатӡом. Агазеҭқәа рҟны еиҳа ахархәара маншәалоуп ArealAB ҳәа иҟоу. Ара акомпиутер аклавиатура аҽаԥсахӡом. Астол гьежь аҟны иазааҭгылеит инеибеиԥшны зегьы «Индизаин» апрограммахь ишиасроу. Аинформациатә технологиақәа есымшааира аҿыцрақәа аларгалоит, еиӷьыртәуеит. Аԥсынгьы уи ршьаҿа ақәыршәаны ԥхьаҟа ицалароуп.

Аус иазааԥсо адырыҩцәа

Аԥснытәи аҳәынҭқарратә университет аҟынтәи абри аус иазааԥсо, адырыҩцәа Адгәыр Қапба, Андреи Абыхәба, Инар Саӡба реиԥш иҟоу хәарҭара злоу апроектқәа аус рыдырулоит. Урҭ аҟазацәа ирҳәеит, аԥхьаҟазы акадр ҿыцқәа шеиҵааӡалатәу. Апроектқәа ус рыдулараан иааԥшит апрограммистцәеи, аполиграфистцәеи, адизаинерцәеи, абызшәадырҩцәеи, алингвистцәеи, афилологцәеи аус шеицыруракәу. Иҳәан, ишеиқәыршәатәу аорфографиатә жәар, аорфографиатә аелектронтә жәар аиқәыршәара шалыршахаша. Нас акырӡа иманшәалахоит аԥсуа бызшәа аҭагылазаашьа, аҩышьаԥҟареи уи иацу акәамаҵамарақәа зегьы рырманшәалара рылшоит апрограммистцәа. Ашрифтқәа рҟны иазгәаҭатәуп: агазеҭ иатәу, ажурнал ианаало, ашәҟәҭыжьраҿ рхы иадырхәо, ахәыҷтәы литература зынӡа даҽа шрифтқәак шаҭаху. Уи ишахәҭоу рхы иадырхәарц азы Индизан апрограамала иалыршахоит.   

Астол гьежь иалахәын Аԥсны ашәҟәыҩҩцәа Реидгыла ахантәаҩы Вахтанг Аԥҳазоу, абызшәатә политиказы Аҳәынҭеилакы ахантәаҩы Баҭал Ҳагәышь, агазеҭ «Аԥсны» аредактор хада Енвер Ажьиба, ААУ аматематикеи аинформатикеи ркафедра аиҳабы Адгәыр Қапба, акафедра адоцент андреи Абыхәба, арҵаҩы-апрограммист инар саӡба, адизаинер мактина Гогиаԥҳа, авиорстка знапы алаку Адамыр Беренџьи, Медеиа Лакоба, иара убас Амилаҭтә библиотека ахада Барис Ҷолариа, ажурналистцәа уҳәа егьырҭгьы. Аиқәшәараҿы иазыӡбан, еиуеиԥшым аусҳәарҭақәа русзуҩцәа рзы иаарласны еиҿкаазарц акурсқәа, апрактикаҿы ахархәашьа дырҵаразы, уи аусура ҳәаақәнаҵоит, аҳәынҭқарратә бызшәатә политиказы Аҳәынҭқарратә еилакы.