И. Гь. Папасқьыр ихьӡ зху Амилаҭтә библиотекаҿы имҩаԥган «Большой террор в Абхазии» захьӡу III-томкны иҭыҵыз ашәҟәы аӡыргара. Ашәҟәы иагәылоуп 1937-1938 шш. рзы Аԥсны имҩаԥысуаз аҭоурых. Ашәҟәы аӡыргара иалахәын Аԥсны Аҳәынҭқарра Ахада Р. Ҳаџьымба, Аԥсны Жәлар Реизара ахантәаҩы В. Кәарҷиа, иара убас ауаажәларра аусзуҩцәа.

Ашәҟәы ҭыжьуп Европа Ахеилак НПО «Алаша»  ацхыраарала. Апроект аиҿкааҩ Зураб Лакербаи иажәақәа рыла, ашәҟәы аҭыжьра аус напы адыркит ҩ-шықәса раԥхьа. Иазгәеиҭоит уи даара ишыцәгьаз, ақырҭцәа рган ақәыршаҳаҭра, архив аартра, аха агәра ддыргеит ишамуаз аҭоурых арӡра. Аусура цон иҵәахны, рыҩбжьаракгьы русура бзиан ихадырҭәааит.

Ари апроект Аԥсны аганахьала хадас даман Станислав Лакоба. Ашәҟәы шьақәгылоуп х-томкны, арепрессиатә 1937-1938 шықәсқәа рзы идыргәаҟыз иршьыз акгьы зхараӡамкәа ирызкуп. Даара ирацәоуп адокументқәа ауаа ирымбац, ара ирыԥшаар ҟалоит рыуа-рҭахы рыхьыӡқәа. Актәи ашәҟәы - аматериалқәа ԥшаауп Қырҭтәылатәи архьив аҟны, аҩбатәи - Аԥснытәи архив аҟны, ахԥатәи - ахьӡ-жәлатә рбагақәа рыла. Аԥснынтәи ирӡын ишьын 2186-ҩык. Урҭ рахьтә иҟан егьырҭ атәым жәларқәагьы, аха аԥсуаа зегь раҵкьыс рхыԥхьаӡара рацәан.

Европа Ахеилак адепартамент директор Анна Копелла иазгәалҭеит: «Ашәҟәы аус адулоуп Аҟәатәии Тбилисиатәи архиви, аҭорыхҭҵааҩцәеи рыспециалисттә усурала аџьабаа баны инагӡан апроект. Апроект хықәкы хадас иаман арепрессиа ззыруз ауаа рыуацәа-рҭахцәа инхаз, ииашоу аинформациа рызнагара».