И. Гь. Папасқьыр ихьӡ зху Амилаҭтә библиотекаҿы имҩаԥган итрадициахаз «Шьынқәба иаԥхьарақәа» захьӡуа ахәылԥаз. 

Алитература еиднакылоит...

Абар быжьшықәсоуп ҳбиблиотекаҿы амилаҭтә литература аҟәша еизнагоижьҭеи Баграт Уасил-иԥа Шьынқәба иҩымҭақәа абзиабаҩцәа. 2007 шықәса раахыс итрадициахаз «Шьынқәба иаԥхьарақәа» ахәылԥаз амҩаԥгара ҳара ныҳәа дук иаҳзаҩызоуп. Ажәа сахьарк знапаҿы ҟазарала иааганы аҩымҭа ссирқәа аԥызҵаз ихьӡ акамыршәра - абри ауп есышықәса «Шьынқәба иаҳьарақәа» ҳмилаҭтә библиотекаҿы амҩаԥгара ҵаҵӷәыс иаҵоу.

Сынтәа ари ахәылԥаз еиҿызкаауаз ааԥхьара рырҭеит ашәҟәыҩҩцәа, алитератураҭҵааҩцәа, ауаажәларратә еиҿкаарақәа, аҳәынҭқарратә усзуҩцәа, иара убас аԥсуа школ хәыҷқәа, баграт шьынқәба ипоезиа абзиабаҩцәа. Баграт Шьынқәба ихьӡи иҩымҭақәеи ес-ииуа ирыциуеит. Уи ибызшәа, иажәа рзааигәоуп хәыҷгьы-дугьы, убри азоуп иҩымҭақәа бзиа ибаны изрыдыркылоугьы Аԥсны аҩнуҵҟа еиԥшь, Аԥсны анҭыҵгьы.

Ажәеинраалақәа ирыԥхьеит...

Ишаԥу еиԥш ахәылԥаз ааиртит Амилаҭтә библитотека аиҳабы Борис Шьаликәа-иԥа Ҷолариа. Уи иҳәеит Баграт Уасил-иԥа Шьынқәба аԥсуа литератураҿы иҩымҭақәа ҭыԥс иааныркыло, иара адунеизегьтәи алитератураҿынгьы. Шьоҭа Ҟасҭеи-иԥа Арсҭаа еизаз ирзеиҭеиҳәеит, уи иԥсҭазаараҿы изакә ролиу Б. Шьынқәба иааникылаз. Ирацәаҩуп ажәахәқәа змаз, урҭ зегь хаҭа-хаҭала ирзааҭгылеит ашәҟәыҩҩы ирҿиаратә мҩа.

Ахәылԥаз иалахәын Баграт Уасил-иԥа Шьынқәба ихьӡ зху Аҟәатәи актәи абжьаратә школ аҵаҩцәа. Урҭ гәахәарыла иаԥхьеит Б. Шьынқәа иажәеинраалақәа. Иара убас ашәаҳәаҩ қәыԥш Лера Адлеиԥҳа иналыгӡеит ашәа «Шьышь-нани».

Баграт Уасил-иԥа Шьынқәба аԥсуа жәлар зегьы даҳгәадуроуп. Уи даԥсахеит ижәлар рыбзиабара. Иҩымҭақәа еиҭагоуп еиуеиԥшым атәым бызшәақәа рахь.