Print this page

Борис Ҷолариа: «АРИНАХЫСГЬЫ ХЬЫМӠӶЫ АНЦӘА ИШӘИМЫРГААИТ!»

Жәабран 27, 2020 523

И.Гь. Папасқьыр ихьӡ зху Аҧсны амилаҭтә библиотека аиҳабы Б.Шь. Ҷолариа Аҧсны амассатә информациа ахархәагақәа русзуҩцәа дрыдныҳәалеит.

Ҳаҭыр зқәу Аҧсны амассатә информациа ахархәагақәа русзуҩцәа, агазеҭ «Аҧсны» аколлектив!

И.Гь. Папасқьыр ихьӡ зху Аҧсны амилаҭтә библиотека ахьӡала гәык-ҧсык ала ишәыдысныҳәалоит раҧхьаӡатәи аҧсуа газеҭ «Аҧсны» актәи аномер ҭыҵижьҭеи 101 шықәса аҵреи Аҧсны амассатә информациа ахархәагақәа русзуҩцәа рымшныҳәеи!

Аҧсны жәлар рпоет, аҧсуа литература ашьаҭаркҩы Дырмит Иасыф-иҧа Гәлиа ихациркыз агазеҭ «Аҧсны» ала иаатуеит ҳтәыла амассатә информациа ахархәагақәа рҭоурых. Убри инаркны аҧсуа журналистика аҿиара, аизҳара амҩа ианылеит. Аҧсуа кьыҧхь акыр иҿиеит, ҧхьаҟа ицеит  асовет аамҭазы, рхыҧхьаӡара акырынтә иазҳаит уи амаҵ азызуаз ауаагьы.

Аҧсны амассатә информациа аусзуҩцәа хьыӡла-ҧшала руалҧшьа нарыгӡеит 1992-1993 шықәсқәа рзтәи Аџьынџьтәылатә еибашьраан, аӡәырҩыгьы рхы ақәырҵеит.

Иахьа ихьыҧшым, зыхиақәиҭу, иазхаҵоу ҳҳәынҭқарраҿы амассатә информациа ахархәагақәа русура еиҳагьы аҭакҧхықәра ду ацуп. Шәара, уи аусзуҩцәа, ишәҧыло ауадаҩрақәа хьаас имкыкәа, шәус ҩнапыкла ишәкуп. Аринахысгьы хьымӡӷы анцәа ишәимыргааит!

Гәык-ҧсык ала зегьы ишәыдысныҳәалоит. Ишәзеиӷьасшьоит агәабзиара, агәамч, агәалаҟазаара ҳаракы, ажәабжь бзиақәа!   

  Ҳаҭырла,

И.Гь. Папасқьыр ихьӡ зху

Аҧсны амилаҭтә библиотека аиҳабы

Б.Шь. Ҷолариа

Last modified on Donderdag, 27 Жәабран 2020 13:54