Хәажәкыр 28, 2024

Ӡаӡ Дарсалиа - 120 шықәса

Декабр 13 рзы И. Гь. Папасқьыр ихьӡ зху Амилаҭтә библиотекаҿы имҩаԥган апрозаик, апублицист, адраматург, еицырдыруа ажәа азҟаза, уаажәларратә усзуҩы Ӡаӡ Харитон (Хәанакьа)-иԥа Дарсалиа диижьҭеи 120 шықәса ихыҵра иазкыз аиубилеитә хәылԥазы.

Уи еиҿыркаат Аԥсны ашәҟәыҩҩцәа Реидгылеи Амилаҭтә библиотека аусзуҩцәеи. Арахь имҩахыҵит ашәҟәыҩҩцәа, ауаажәларратә усзуҩцәа, ашкол хәыҷқәа, астудентцәа, иара убас Ӡаӡ Дарсалиа иуацәа.

Ишаԥу, еиԥш ахәылԥаз ааирт Борис Шьаликәа-иԥа Ҷолариа.

Уи далацәажәеит Ӡ. Дарсалиа аԥсуа литератураҿы ашәҟәыҩҩцәа раԥхьатәи рабиԥара иаҵанакуа илагала шдуу, амилаҭтә литература иналукааша аклассикцәа дшыруаӡку.

Ашәҟәыҩҩцәа Реидгыла ахантәаҩы Вахтанг Аԥҳазоу дазааҭгылеит Ӡаӡ Дарсалиа инысымҩа: «Ӡаӡ Дарсалиа диит Аҟәатәи аокруг Кәыдрытәи аучастка Гәыԥ ақыҭан 1898 шықәса август 16 рзы. Аҵара иҵон Гәыԥтәи алагарҭатә школ аҟны. 1914 ш. рзы дҭалоит Очамчыратәи иреиҳау алагарҭатә школ. Аха аԥара иахшәаатәыз ахьимоуз иахҟәаны аҵара аанижьыр акәхеит. 1916 шықәсазы аҵара иҵон Аҟәатәи арҵаҩратә курқәа рҟны, ашьҭахь арҵаҩратә семинариа, нас арҵаҩратә техникум, дагьалгоит 1923 шықәсазы. Ҩышықәса рҵаҩыс аус иуан Кәтол ақыҭан. 1925 ш. рзы Тифлистәи аполитехникатә институт дҭалоит, адырҩашықәсан диасуеит Краснодартәи арҵаҩратә институт ахь. Аха игәамбзиара иахҟьаны дхынҳәуеит Аԥсныҟа.30 шықәса инеиԥынкыланы агазеҭ «Аԥсны ҟаԥшь» аҭакзыԥхықәу амаӡаныҟәгаҩыс дыҟан. Ӡ. Дарсалиа аԥхьа поезиа ала далагазаргьы, хара имгакәа апрозахь диасуеит. С. Ҷанба ишьҭахь Ӡ. Дарсалиа аԥсуа драматургиа ауасхыр азышьҭазҵаз иакәны дыҟоуп. Уи авторс дрымоуп аҭоурыхтә, асоциал-бзазаратә ҵакы змоу ажәабжьқәеи аповетқәеи маҷымкәа... Ашәҟәыҩҩы аиҭагара аҟынгьы ишьҭа ӷәӷәаны ианиҵеит, еиҭеигеит А. Пушкин иҩымҭа «Акапитан иԥҳа» уҳәа уб. егь.». Иара убас иҳәеит В. Аԥҳазоу раԥхьаӡа акәны Ӡаӡ Дарсалиа ихьӡ зху апремиа шаԥҵахаз, насгьы уи иаиааиз рыхьыӡқәа. Ахәылԥаз иалахәыз апоетцәа, ашәҟәыҩҩцәа рықәгыларақәа рҟны иазааҭгылеит Ӡаӡ Дарсалиа ирҿиара, иаԥҵамҭақәа. Ашәҟәыҩҩы Т. Ҷаниа иҳәеит: «Ӡаӡ дызлаҩуаз абызшәа ацқьара, аилыххара, абеиара, ишаадырԥшуа ахатәы бызшәа иамоу алшарақәа, ҳәарада, аԥсуа литература арҿиараҿы, алитературатә бызшәа аихаҳараҿы злагала шьардоу дышреиуаз ашәҟәыҩҩы...».

Аԥсуа рхеолог Олег Бӷажәба дазааҭгылет: Ӡаӡ Дарсалиа иҭаацәараҿы дзеиԥшраз, дшыхцәырымгаҩыз, насгьы уи иԥа Владимир Дарсалиа дышкритик дууз атәы. Аиубилеитә хәылԥазы далахәын апоет, аҵарауаҩ, Аԥсны Аҳәынҭқарра Ахада иабжьгаҩ Владимир Константин-иԥа Занҭариа. Уи дазгәдуны иреиҳәеит еизаз Ӡ. Дарсалиа илагала ду аиҭагара аус аҟны.  

Аиубилеи иацҵо, Д. И. Гәлиа ихьӡ зху аԥшьатәи абжьаратә школ аҵаҩцәеи Аԥснытәи аҳәынҭқарратә университет афилологиатә факультет астдентцәеи ирыԥхьеит уи ипрозақәа рцыԥҵәахақәа, иҩымҭақәа рҟынтәи ацитатақәа.

Last modified on Maandag, 17 Desember 2018 15:57

Please publish modules in offcanvas position.

Яндекс.Метрика